श्री रामकृष्ण शिक्षण मंडळाचे आद्य संस्थापक कै. डॉ.त्रिंबक रामचंद्र नरवणे यांनी १९६५ मध्ये श्री रामकृष्ण शिक्षण मंडळाची स्थापना केली आणि कांदिवलीतील शैक्षणिक क्षेत्रात वावरणाऱ्या मंडळींना बरोबर घेऊन संस्थेच्या उद्दिष्टांच्या पूर्ततेसाठी एक समिती स्थापन केली. या समितीचे अध्यक्ष डॉ.त्रिंबक रा. नरवणे व प्रमुख कार्यवाह श्री.विनायक मा. शिर्के हे होते. या समितीने जून १९६५ मध्ये श्री रामकृष्ण शिक्षण मंडळाचे ‘ दादा नरवणे विद्यालय ‘ या मराठी माध्यमाच्या शाळेची सुरुवात केली.त्यावेळी कांदिवली येथे मराठी माध्यमाची शाळा नव्हती.मराठी भाषिक मुलांची आत्यंतिक निकड लक्षात घेऊन ही मराठी माध्यमाची शाळा ४४ विद्यार्थ्यांना प्रवेश देऊन सुरू करण्यात आली.

शाळेच्या विकासासाठी त्यावेळी शिक्षक,पालक व हितचिंतक या सगळ्यांनीच खूप मोलाचे सहकार्य केले आणि बघता बघता विद्यार्थी संख्या वाढत जाऊन १९७१ मध्ये मंडळाने शाळेसाठी टुमदार बैठी इमारत उभारली . १९९३ पासून शाळा नवीन दुमजली इमारतीत भरू लागली. शिक्षणा विषयीच्या आस्थेमुळे आज ह्या संस्थेचे मोठ्या शैक्षणिक संकुलात रूपांतर झाले आहे. त्यात मराठी माध्यमाच्या तीन शाळा, इंग्रजी माध्यमाच्या तीन शाळा, कॉमर्स कॉलेज, दिव्यांग विद्यार्थ्यांसाठी दोन विशेष शाळा, एक कार्यशाळा व स्पोर्ट्स अकॅडमी या सगळ्या विभागांचा समावेश आहे .

ज्ञानाबरोबरच ‘ विद्यार्थ्यांचा सर्वांगीण विकास हाच आमचा ध्यास ‘ या ध्येयाने प्रेरित होऊन हे मंडळ नेहमीच विद्यार्थ्यांसाठी विविध उपक्रम यशस्वीरित्या राबवित असते. तसेच शैक्षणिक कार्याबरोबर सामाजिक बांधिलकीही जपण्याचा सतत प्रयत्न करीत असते. त्यातूनच समाजातील उपेक्षित घटकांसाठी अनेक योजना राबविण्यात हे मंडळ सतत कृतिशील दिसते.